Rojnamegerî û Zimanê Kurdî

Rojnamegerî û Zimanê Kurdî

Piştî ku 114 sal bihûrîn ser rojnamegeriya kurdî gelo zimanê  kurdî gihêştiye çi astê? Di 22 yê nîsana 1898 an de rojnameya yekemîn bi navê Kurdistan bi zimanê kurdî, tîpên erebî derketibû, û ji wê demê heya roja îro bi dehan rojname û kovar bi zimanê kurdî derketin, bi zaraveyên kurmancî û soranî û bi tîpên latînî û tîpên erebî, lê di baweriya me de, ev hemû rojname û kovarên ku derketine û hêjî derdikevin, hindik têne xwandin, ev jî gelek sedemên wê hene, hinek sedem girêdayî rewşa kurdan a siyasî ne, û nebûna dibistanan û fêrnebûna zimanê kurdî, hinek sedem jî girêdayî rewşa aborî ne, lê sedema herî girîng girêdayî kurdan bi xwe ye, ji ber ku heya niha me hîsnekirî ku fêrbûna zimanê kurdî erk û peywereke netewî ye, heya niha ew vîn û despan me di xwe de nedîtî ku fêrî zimanê dayîkê bibin.

Bê guman gava ku rojnameya kurdî a yekemîn derketiye, arnamc jê ew bû ku çanda kurdî, dîroka kurdan û huner û kelepora kurdî li pêşberî gelê Kurd bê ravekirin, lê helbet armanceke wê din jî hebû, ku keç û xortên Kurd fêrî zimanê kurdî bibin, her wiha ev armanc a yekemîn bû gava Celadet Bedirxan kovara Hawarê bi kurmanciya latînî derxistiye.

Rastiyek heye divê em Kurd hemî bizanibin, di van çend dehsalên pêşiya me de gelek ziman di cîhanê de wê windabibin, belavbibin û tunebibin,û wê tenê bimînin zimanên devkî, û ne dûre zimanê kurdî jî yek ji wan zimanan be, ji ber ku zimanê ku pê neyê xwandin û nivîsandin wê bibe para winabûnê.

Wek ku tê zanîn ziman regeza serekeye di hebûna her nasnameyekê de, û ziman ew nasnameya civakê dide xuyakirin, lewre eger em Kurd naxwazin nasnameya xwe windabikin pêwîste em xwedî li zimanê xwe derkevin, fêrbibin, pê binivîsin, bixwînin û bihizirin.

Ehmedê Yûsif

22/04/2012

Denmark